Жамбыл облысы Т.Рысқұлов атындағы Орталық аудандық ауруханасында Қоғамдық денсаулық сақтау ұлттық орталығының мамандары Гаухар Агажаева мен Динара Омарова «Босану және балалық шақтағы инфекциялық бақылау» тақырыбында медициналық қызметкерлерге арналған біліктілікті арттыру оқытуын жүргізді.
Оқыту жұмыс орнында өтті және клиникалық әрі қосалқы бөлімшелерде инфекциялық қауіптерді бағалау мақсатында трейсерлік бақылаумен қатар жүзеге асырылды. Мұндай тәсіл мамандарға теориялық талаптарды түсіндірумен қатар, нақты жұмыс жағдайында кездесетін тәуекелдерді анықтап, жедел шешу жолдарын қарастыруға мүмкіндік берді.
Эксперттер алғашқы медициналық-санитариялық көмек буынындағы қызметкерлердің құзыреттілігін күшейту инфекциялардың алдын алуда шешуші рөл атқаратынын атап өтті. Себебі ең алдымен пациенттерді қабылдайтын аудандық ауруханалар мен ауылдық амбулаторияларда қауіпсіз жұмыс мәдениеті қалыптасуы – аналардың, жаңа туған нәрестелердің және жалпы денсаулық сақтау жүйесінің қауіпсіздігіне тікелей әсер етеді.
Оқыту барысында келесі бағыттар пысықталды:
- стандартты сақтық шаралары және қол гигиенасы;
- босануды қауіпсіз жүргізу және нәрестеге күтім;
- дезинфекциялық және стерилизациялық режимді бақылау;
- пациент ағынын дұрыс ұйымдастыру;
- инфекциялық тәуекелдерді ерте анықтау және төмендету.
Практикалық оқыту медицина қызметкерлеріне инфекциялардың таралу қаупін азайтуға және антибиотиктерді орынсыз қолданудың алдын алуға мүмкіндік береді. Бұл антимикробтық резистенттілікті тежеуде маңызды қадам саналады.