Қоғамдық денсаулық сақтау ұлттық орталығы медициналық-cанитариялық алғашқы көмек (МСАҚ) қызметкерлеріне арналған арнайы семинарлар сериясын аяқтады. Оқыту бағдарламасына еліміздің 200-ден астам медициналық ұйымынан жалпы практика дәрігерлері, терапевтер және медбикелерден тұратын шамамен 600 маман қатысты.
Бағдарламаның негізгі мақсаты – МСАҚ мамандарының өкпенің созылмалы обструктивті ауруының (ӨСОА) алдын алу, ерте диагностика, пациенттерді бақылау саласындағы кәсіби құзыреттерін арттыру, сондай-ақ тыныс алу жүйесінің созылмалы аурулары бар пациенттерге көрсетілетін көмектің сапасын жақсарту. Қатысушылар ауруды заманауи әдістермен анықтау тәсілдерін, спирометрия жүргізудің ерекшеліктерін, амбулаториялық бақылау қадамдарын және ингаляциялық препараттарды ұтымды қолдану қағидаттарын меңгерді.
Семинарлар Қазақстанның 10 өңірінде жетекші пульмонологтардың қатысуымен өтті. Іс-шаралар Қазақстан Республикасының Денсаулық сақтау жүйесін дамыту концепциясы аясында ұйымдастырылды.
Ерте диагностика ӨСОА өршуін баяулатып, пациенттердің өмір сапасын жақсартуға және ауыр асқынулардың алдын алуға мүмкіндік береді. Бұл ауру көбіне жасырын дамитындықтан, дәрігерге жүйелі түрде қаралу және алғашқы белгілерге мән беру аса маңызды. Өкпенің қызметін бағалауда және бұзылыстарды дер кезінде анықтауда спирометрия негізгі құрал болып табылады.
ӨСОА-ның негізгі қауіп факторларына белсенді және пассивті темекі шегу, ластанған ауаның әсер етуі, кәсіби зияндылықтар, ерте кезеңдегі қолайсыз даму жағдайлары және сирек кездесетін генетикалық ерекшеліктер жатады. Осы факторларды бақылау және өмір салтын өзгерту аурудың даму ықтималдығын айтарлықтай төмендетеді.
Қауіптерді азайту және асқынулардың алдын алу үшін мамандар темекінің кез келген түрінен және вейпингтен бас тартуға, темекі түтіні мен тұрмыстық түтін әсерінен аулақ болуға, тұрақты физикалық белсенділікті сақтауға, жыл сайын тұмауға және пневмококк инфекциясына қарсы екпе алуға кеңес береді.