COVID-19-ға қарсы вакциналау. Халықаралық коронавируспен күрес тәжірибесі

15 сәуірде Әл-Фараби атындағы Қазақ ұлттық университетінің медицина және денсаулық сақтау факультетінде ZOOM платформасында “COVID-19-ға қарсы вакциналау” тақырыбында дөңгелек үстел өтті. Дөңгелек үстел жұмысына Қазақстан мен Өзбекстанның жетекші ғалымдары, дәрігер-эпидемиологтары қатысты.
Онлайн кездесуді аша отырып, ҚР ДСМ “Қоғамдық денсаулық сақтау ұлттық орталығы” ШЖҚ РМК Басқарма төрайымының орынбасары, м.ғ.к. Айнагүл Қуатбаева ҚР ДСМ ҚДСҰО және коронавируспен күрес бойынша жедел әрекет ету орталығының қызметі туралы жан-жақты айтып берді.– Айнагүл Мұқанқызы Қоғамдық денсаулық сақтау ұлттық орталығының 2018 жылдың қаңтарында Үкімет қаулысымен құрылғанын айтты. Оны құру заманауи халықаралық стандарттарға сәйкес санитариялық-эпидемиологиялық мониторинг пен бақылау жүйесін жаңғыртумен байланысты. Жаңа үлгіде инфекциялық және инфекциялық емес аурулардың алдын алу, салауатты өмір салтын насихаттау және тиімді тамақтану мәселелері біріктірілген. Атап айтқанда, коронавируспен күрес жөніндегі жедел әрекет ету орталығының міндеттерінің бірі – халықты тексерілген ақпаратпен қамтамасыз ету. Бұл қазіргі таңдағы әлеуметтік желілерде жалған ақпарат таратылуы мүмкіндігінде өте маңызды. Коронавирусқа қарсы мәселелер жөніндегі барлық ресми деректер орталықтың сайтында қол жетімді.
ҚР ДСМ ҚДСҰО “СЭСжБҒПО” филиалының жедел қызмет жөніндегі директордың орынбасары Манар Смағұл Қазақстан Республикасындағы вакциналау туралы айтып берді.
– Қазақстанда коронавирусқа қарсы вакциналау 1 ақпаннан басталды. КВИ-ға қарсы вакциналау үшін Ресейде өндірілген Гам-Ковид-вак (“Спутник V”) вакцинасы қолданылады. Қазақстанда вакциналау ерікті болып табылады. Вакциналау вакцинаның түсуін ескере отырып, кезең-кезеңімен жүзеге асырылады. Бұл ретте, бірінші кезекте, иммундауға жататын халықтың қалған топтарын одан әрі қамти отырып, коронавирустық инфекцияның жұқтыру және таралу қаупі жоғары халықтың осал топтары вакциналауға жатады. Бірінші кезеңде жұқпалы аурулар ауруханаларының, жедел медициналық жәрдем, қабылдау бөлмелерінің медицина қызметкерлері, санитарлық-эпидемилогиялық қызметкерлеріне екпе егілді. Ағымдағы жылдың қыркүйек айының соңына дейін Қазақстанда 10 миллион адамға екпе егу жоспарланған.
Өзбекстан Республикасын Өзбекстан Денсаулық сақтау министрлігінің бас иммунологы Дилором Турсунова таныстырды. Дилором Алимовнаның айтуынша: “Өзбекстанда жаппай вакциналау 1 сәуірде басталған”. Бірінші кезеңде халыққаAstrazeneca және ZF-UZ-VAC 2001 вакцинасы егілді. Бастапқыда Дүниежүзілік денсаулық сақтау ұйымының (ДДСҰ) ұсынысы бойынша және Өзбекстанның Денсаулық сақтау министрінің бұйрығына сәйкес басқа елдердің тәжірибесін зерттей отырып, ел халқы жұқтыру қаупі бойынша санаттарға бөлінді. Бұл санаттарға жұқтыру қаупі өте жоғары адамдар кіреді – 65 жастан асқан адамдар, медициналық қызметкерлер, созылмалы аурулары бар науқастар, диспансерлік бақылауда адамдар. Инфекцияға қарсы вакциналау орталық көпбейінді емханаларда, отбасылық емханаларда, отбасылық дәрігер пункттерінде және мобильді топтарда жүргізіледі. Вакцинацияны арнайы вакциналау жөніндегі дайындалған және сертификатталған мамандар жүргізеді. Жалпы Өзбекстанда бірінші кезеңде 4 миллион 112 мыңнан астам адамға екпе егу жоспарланған.
Онлайн кездесуді қорытындылай келе, қатысушылар COVID-19-ға қарсы күрестің өзекті мәселелері бойынша ынтымақтастықты жалғастыруға дайын екендіктерін білдірді және ортақ зерттеулерге арналған бірқатар тақырыптарды белгіледі.