Қоғамдық денсаулық сақтау ұлттық орталығы басшысының орынбасары Салтанат Назарова 16–17 наурыз күндері Мәскеуде өткен «Салауатты қоғам» халықаралық форумына қазақстандық делегация құрамында қатысты.

Іс-шара барысында денсаулық сақтау саласын дамытуға қатысты өзекті мәселелер қаралды. Атап айтқанда, салауатты өмірді қолдайтын технологияларды енгізу, цифрлық экожүйелерді дамыту, психикалық денсаулықты нығайту, сондай-ақ аурулардың алдын алу мен емдеудің заманауи тәсілдері талқыланды.

Сапар аясында қазақстандық делегация Ресей Федерациясының жетекші медициналық ұйымдарында болды. Атап айтқанда, Ресей Денсаулық сақтау министрлігінің Терапия және профилактикалық медицина ұлттық ғылыми-зерттеу орталығы, Дмитрий Рогачёв атындағы Балалар гематологиясы, онкологиясы және иммунологиясы ұлттық ғылыми-зерттеу орталығы, сондай-ақ С.П.Боткин атындағы Мәскеу көпсалалы ғылыми-клиникалық орталығының жұмысымен танысты. Онда медициналық көмекті ұйымдастыру, профилактика және денсаулық сақтау жүйесін басқару тәжірибелері зерделенді.

Сондай-ақ, тараптар алдағы ынтымақтастық мәселелеріне ерекше назар аударды. Қоғамдық денсаулық сақтау ұлттық орталығы мен Ресей ДСМ Терапия және профилактикалық медицина ұлттық ғылыми-зерттеу орталығы өкілдері ЕАЭО елдерінің Қоғамдық денсаулық мектебін құру бастамасын талқылауды жалғастырды. Ортақ білім беру кеңістігін қалыптастыру, мамандарды даярлау бағдарламаларын үйлестіру және үздік тәжірибелермен алмасу бағыттары айқындалды.